Бүгүн Ысык-Көлдүн Чолпон-Ата шаарындагы «Рух Ордо» маданий-этнографиялык комплексинде дүйнөлүк «Рух Санат» салттуу маданият жана музыка фестивалы башталды.
Алгач салтанаттуу иш-чаранын символикалык боосу кесилип, андан соң келген конокторго “Рух Ордо” маданий-этнографиялык комплекси, кыргыз элинин каада-салты жана маданияты тааныштырылды. Фестивалдын расмий ачылышы бүгүн кечинде өтөт.
Үч күнгө созулган фестивалга дүйнөнүн 37 өлкөсүнөн 130дан ашуун салттуу музыкалык искусство ишмерлери, музыканттар, изилдөөчүлөр, эксперттер, продюсерлер катышат. Алар өз элдеринин кылымдарды карыткан, кайталангыс музыкалык жана маданий каада-салттарын, руханий мурастарын дүйнө коомчулугуна тартуулашат.
Иш-чара президент Садыр Жапаровдун колдоосу менен ишке ашырылууда.
