Борбор калаанын «Чыгыш-5» кичи районунда түн ичинде болгон окуядан алты адам ооруканага жаткырылды. Бул тууралуу Тез жардам борборунун жетекчиси Искендер Шаяхметов билдирди.
Анын айтымында, медиктер жалпысынан 10 адамга жардам көрсөтүшкөн.
«Бир адам бычактан орточо оор жаракат алып, Улуттук хирургия борборуна жаткырылды, калгандары түтүнгө ууланып, Клиникалык тез жардам ооруканасынын күйүк жана токсикология бөлүмүнө жаткырылды. Бир адамдын алаканы жана оң колу жеңил күйүк алган. Жабыркагандардын басымдуу бөлүгү түтүнгө уулангандар. Алардын абалы учурда канааттандыраарлык», — деди ал.
Жабыркагандардын арасында жаш балдар болгон эмес.
Буга чейин милиция кызматкерлери «Чыгыш-5» кичи районундагы көп кабаттуу үйлөрдүн биринен эки киши бычакталып, өрт чыкканын кабарлаган.
