Жалал-Абадда спорттун грек-рим күрөшү боюнча Дүйнө биринчилигинде ийгилик жараткан спортчуларды салтанаттуу тосуп алышты. Бул тууралуу шаардык мэриядан билдиришти.
Маалыматка ылайык, Иордания мамлекетинин Амман шаарында спорттун грек –рим күрөшү боюнча дүйнө биринчилигинде жаштар арасында 87 кг салмакта Асан Жанышов коло медаль, ал эми Эрлан Марс уулу 77 кг салмакта күч сынашып, 5-орунду ээлеген.
12-сентябрда ийгилик жараткан спортчуларды «Жалал-Абад» аэропортунан шаар мэринин орун басары Гүлбарчын Таштанбекова, жаштар иштери, дене-тарбия жана спорт бөлүмүнүн башчысы Таласбек Нуралиев, ата-энелер жана күйөрмандары тосуп алышты.
Учурда жаш балбандарды КРнын эмгек сиңирген машыктыруучсу Шадыбек Сулайманов, Чыңгыз Пиримкулов машыктырып келет.
