Жогорку Кеңештин бүгүнкү жыйынында депутат судьяны коррупцияга айыптап, судья депутатты элдин алдында кечирим суроосун талап кылды.
Депутат Айбек Алтынбеков судья Нүргүл Бакировага кайрылды. Эл өкүлүнүн айтымында, Жалал-Абад шаарында Абилова аттуу жаран жашыл участокко мыйзамсыз кызыл китеп чыгартып алган. Кийин бул боюнча Мамкаттоонун кызматкери жоопко тартылып, айыпка жыгылган.
“Жалал-Абад шаарынын мэриясы сотто биринчи, экинчи инстанцияда утуп келет. Бирок Жогорку сотко келгенде эле сиз тарабынан дайыма процесс артка кайтарылууда. Сиз 2-3 жолу мамлекеттин кызыкчылыгын колдобой, жеке таанышыңызга жардам берип койдуңуз”, — деп судьяны жемеледи депутат. Алтынбеков УКМКга кайрылып, бул окуяны көзөмөлгө алууну суранды.
Жогорку соттун төрагасынын административдик иштер боюнча орун басары Нүргүл Бакирова депутат анын дарегине атайын даярдалган сөздү айтканын билдирди. “Айбек Алтынбекович элдин алдында кечирим сурайт деп ойлойм. Мен өзүмө ишенген үчүн эл өкүлдөрүнүн алдына келип отурам”, — деди судья Бакирова.
Посмотреть эту публикацию в Instagram
