Бүгүн, Жогорку Кеңештин жыйынында депутат Жалолидин Нурбаев театрда коюлган спекталге нааразы болду. Ал тиешелүү министрликтен спектаклдердин репертуарларын көзөмөлгө алууну суранды.
«Театрларыбызда жылаңач көрсөтүүлөр да болуп жатат. Кайда баратабыз? Ыйман, адеп-ахлак, тарбия маселесинде мааниси жок көрүнүш болуп жатат. Уят да! Элдин 80% ашыгы мусулмандар. Ошолорду көзгө илбей, жапайычылыкты көрсөтүп жатканы ыплас иш болду», — деди Нурбаев.
Эске сала кетсек, 28-сентябрда К. Жантөшев атындагы музыкалык драма театры Бишкекке болгон чыгармачылык сапарынын алкагында КР эл жазуучусу Султан Раевдин повестинин негизинде, Уланмырза Карыпбаев режиссерлук кылган «Күн кармаган бала» спектаклин тартуулашкан.
Анда жылаңач жуунуп жаткан баланын көрүнүшү талкуу жараткан. Социалдык тармактын колдонуучулар эки жаат болуп, бири уят десе, экинчиси искусство деген тартыш жаралган.
