Экономика министри Данияр Амангелдиев Кумтөрдө келээрки 2 жыл аралыгында алтынга кедей кен казылаарын эске алуу менен өлкө экономикасынын өсүшү мурда божомолдонгондой 8,2% эмес, 6,2% болоорун билдирди.
Анын айтымында, министрлик тарабынан экономикалык өсүштүн бир нече божомолу даярдалып, өлкө жетекчилигине жана макрокеңешке сунушталган. Алар: 8,4% деген оптимисттик божомол, орточо өсүү темпи менен 7,2% божомол жана 6,2% деген базалык сценарий. Кылдат талдоодон кийин 6,2% базалык божомл иандалып, ошого жараша аракеттер көрүлүүдө.
«Азыр Кумтөрдө иштетилип жаткан кендин көлөмү азайган жок. Учурда алтынга кедей топурак казылууда жана мындай абал дагы эки жылга созулат деген божомол бар. Кен жайы өзүнүн долбоордук кубаттуулугуна 2025-жылдын орто ченинде чыгат. Ошондуктан болжолдонгон көрсөткүчтөрдү аткарууда тобокелчиликтер бар экени эске алынып, экономиканын жыл ичиндеги өсүүсү 6,2% болот», — дейт министр Амангелдиев.
