Элчиликтин консулдук бөлүмүнүн кызматкерлери Кыргызстандын Москвадагы массалык мушташта кармалган жарандары менен жолугушту. Бул тууралуу Кыргызстандын Россиядагы элчилигинин басма сөз кызматы билдирди.
Жолугушуунун жүрүшүндө, жарандарга консультативдик-укуктук жардам көрсөтүлгөн.
Ошол эле мезгилде Россиянын ИИМнин жана ТИМнин өкүлдөрү менен аталган жарандардын укуктарын жана кызыкчылыктарын коргоо боюнча жолугушуулар жана сүйлөшүүлөр жүрүп жатат.
Ошондой эле элчилик тарабынан Россия Федерациясынын компетенттүү органдарына тийиштүү суроо-талаптар жиберилди.
Аталган маселе элчиликтин көзөмөлүндө турат.
Белгилей кетсек, 13-июлда ЖМКларда «Кузьминки» метросунун жанында Москвадагы кыргыз-тажик жарандарынын ортосунда чыр чыккандыгы айтылган. ЖМКлардын маалыматына караганда, мушташ болжол менен Кыргызстан жана Тажикстандан келген эмгек мигранттарынын ортосунда чыккан. Андан соң Кыргызстандын 72 жараны кармалган.
