Кыргызстандын Россия Федерациясындагы элчилиги кыргызстандыктарды 2025-жылдын 10-сентябрына чейин Россия Федерациясынын миграция мыйзамдарына ылайык өзүнүн укуктук макамын алдын ала жөнгө салуу зарылдыгына көңүл бурууда. Бул тууралуу Акипресс басылмасы жазды.
Тышкы иштер министрлигинин маалыматы боюнча, чет өлкөлүк жарандарды мыйзамдаштыруу мөөнөтүнүн аякташы жакындап жатканына байланыштуу Кыргызстандын Россиядагы элчилиги күчөтүлгөн тартипте түшүндүрүү иштери жүрүүдө.
Күн сайын элчиликке 500дөн 700гө чейин КР жараны келет. 2025-жылдын алгачкы жарым жылдыгында элчилик тарабынан 89 464 консулдук кызмат көрсөтүлгөн, алардын ичинен 6 249у жарандардын укуктарын коргоо алкагында болгон.
Документтештирүү боюнча 39 612 жаран кеңеш алды, 5 500 адам жеке кабыл алууга келген. 492 жазуу түрүндөгү арыз каралып, алардын ичинен 409у оң чечимин тапкан. Ички иштер органдарына, оорукана, морг, аэропортторго 240тан ашык консулдук чыгуулар жасалган.
Элчилик белгиленген документтик талаптарды өз убагында аткарып Россия Федерациясынын миграция режимин бузууга байланыштуу терс кесепеттерден алыс болууга чакырат.
