Эрулан Кокуловго жол эрежесин бузган үчүн протокол түзүлдү. Бул тууралуу МККБнын басма сөз кызматы билдирди.
Маалыматка ылайык, кечээ, 26-февраль саат 21:30 чамасында “102” кызматына Тойгонбаев көчөсү 13 дарегинде жашаган тургундардан туура эмес токтотулган унаалар тууралуу маалымат түшкөн.
Окуя болгон жерге барган милициянын кызматкерлери Тойгонбаев көчөсүндө «Токтотууга тыюу салынат» деген жол белгиси орнотулганын аныкташкан. Ага карабастан, аталган белгинин алдында унаалар токтотулуп, башка жол кыймылынын катышуучуларына тоскоолдук жараткан.
Унаалардын биринин ээси дароо аныкталган. Ал унаа Кыргыз Республикасынын Жогорку Кеңешинин депутаты Эрулан Кокуловго таандык экени белгилүү болгон.
Депутат окуя болгон жерге келип, укук бузуу боюнча протокол түзүүгө нааразычылыгын билдирген. Жыйынтыгында Бишкек шаарынын МККБнын кызматкерлери айдоочуга карата унааны токтотуу эрежелерин бузгандыгы үчүн протокол түзүшкөн.
