Миңге жакын турист жана жергиликтүү тургундар Тибеттеги Эверест тоосунун чыгыш капталында катуу бороондон улам камалып калганын Reuters агенттиги кабарлады.
Кар 3-октябрдын түнү башталып ишембиге чейин уланган. Тингри округундагы жергиликтүү туристтик компаниянын расмий WeChat эсептериндеги билдирүүлөргө ылайык, билеттерди сатуу жана Эверест улуттук паркына кирүү токтотулган.
Куткаруу иштери 4,9 километрден (18 500 фут) жогору бийиктикте жүрүп жатат, ал жерде кар лагерлерге баруучу жолдорду толугу менен жаап салган. Бийлик урандыларды тазалоо үчүн жүздөгөн куткаруучуларды жана жергиликтүү тургундарды тартты. Буга чейин тоодон айрым туристтер эвакуацияланган.
Ал арада коңшу Непалда нөшөрлөп жааган жамгырдан улам сел жана жер көчкү жүрүп, кеминде 47 киши каза болуп, жолдор менен көпүрөлөр талкаланды.
