Кемин районунда дыйкандар гектарынан 80 тоннага чейин кант кызылчасын алышууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, быйыл райондо жалпы 884 гектар аянтка кант кызылчасы айдалган. Учурда түшүм жыйноо иштери кызуу жүрүп, талаада 9 комбайн иштөөдө.
Аймактагы дыйкандардын бири 4 гектар аянтка кызылча айдап, 4 жолу сугаргандан кийин ар бир гектарынан 80 тоннадан түшүм алууда.
«Жыйналган кант кызылчасы республикадагы ири завод жана фабрикаларга кайра иштетүүгө жөнөтүлүүдө. Бул өз кезегинде айыл чарба чийки затын кайра иштетүүнү жандандырып, ички өндүрүштү жана экспорттук потенциалды жогорулатууга өбөлгө түзөт», — делет маалыматта.
Белгиленгендей, аймакта Айыл чарба министрлиги тарабынан ишке ашырылып жаткан «3+2+1» долбоорунун алкагында талаа иштерине мониторинг жүргүзүлүүдө.
