«Империя пиццы» кафесинин төрт тамактануу түйүнүнө 36 миң сомдук айыппул салынды. Бул тууралуу Бишкек шаардык санитардык-эпидемиологиялык борборунун Тамак-аш гигиенасы бөлүмүнүн башчысы Махамад Мурзашев «Азаттыкка» билдирди.
Маалыматка ылайык, учурда башка түйүндөргө да жоопкерчилик каралып, алардын ичинен эң көп сумма 7,5 миң сомду түзгөн.
«Лабораториялык иликтөөлөрдүн жыйынтыктары толук чыкты. Учурда алардын негизинде отчет даярдалып жатат. Жалпысынан «Империя пиццы» кафесинин төрт тамактануучу жайына 36 миң сомдук айыппул салынды»,-дейт Мурзашев.
Жапырт уулануу фактысы боюнча Бишкек шаардык милициясы “Санитардык-эпидемиологиялык эрежелерди бузуу” беренеси менен кылмыш ишин козгогон.
Эскерте кетсек, уулангандар 22-23-24-октябрь күндөрү «Империя пиццы» кафесинен тамак алып жеген.
