Дүйнө жүзүндө коронавирустан көз жумгандардын саны 5 миллиондон ашты. Бул тууралуу Дүйнөлүк саламаттык сактоо уюму билдирет.
Маалыматка ылайык, эмдөө жай жүргөндүктөн, пандемия дүйнөнүн айрым аймактарында басаңдаса, Чыгыш Европа сыяктуу кайсы бир региондордо кайра күчөп жатат.
Коронавирустан жабыркаган өлкөлөрдүн сап башында АКШ, Бразилия, Индия, Мексика, жана Орусия турат.
Эскерте кетсек, Орусия 30-октябрдан 7-ноябрга чейин көпчүлүк мамлекеттик мекемелер жана жеке бизнестер үчүн каникул жарыялады. Украинанын баш калаасы Киевде да 1-ноябрдан тарта жаңы эрежелер ишке кирип, жарандар ресторан-кафелерге, спорт залдарына жана соода түйүндөрүнө кирүү үчүн коронавируска каршы эмделгенин же тесттен өткөнүн күбөлөгөн сертификаттарды көрсөтүшү керек.
