Бишкекте ири өлчөмдө «альфа-ПВП» психотроптук баңгизатын сатып жүргөн жаран кармалды. Бул тууралуу Ички иштер министрлигинен билдиришти.
Милицияга азиат улутундагы 30-35 жаштагы жаран Бишкек шаарынын аймагында баңги каражаттарды сатуу менен алектенип жүргөнү тууралуу маалымат түшкөн. Маалыматты текшерүү үчүн тергөө-ыкчам иш-чаралар жүргүзүлүп, жыйынтыгында баңгизаттарды таратуу менен алектенген жарандын өздүгү аныкталган.
Ал 34 жаштагы 1990-жылы туулган Д.М.Д. аттуу жаран экени аныкталган, өз ыктыяры менен кара скотчка оролгон баштыкчаларды берип, баңгизаттарды каткан жерлерин көрсөткөн.
Экспертизанын жыйынтыгы боюнча алынган заттар психотроптук зат — альфа-ПВП экени аныкталган.
Аталган факт боюнча КР Кылмыш-жаза кодексинин «Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо» беренесинде каралган кылмыштын белгилери менен кылмыш иши козголгон.
Учурда кармалган жаран Бишкек шаарынын №1 тергөө абагына киргизилди.
Бул кылмышты жасоого тиешеси бар башка адамдарды аныктоого багытталган ыкчам иш-чаралар улантылууда.
