Көп балалуу энелер 53 жаштан пенсияга чыга алат. Бул тууралуу “Биринчи радионун” эфиринде Социалдык фонддун Коомчулук менен иштөө башкармалыгынын башчысынын орун басары Нурзат Жакиева билдирди.
Анын айтымында, 5 бала же андан көп балалуу энелер 53 жашында пенсияга мөөнөтүнөн мурда чыга алат. Ал үчүн 15 жылдык эмгек стажы жана бешинчи баласы 8 жашка толгон болушу шарт.
Аталган 15 жылдык стаждын ичинде аялдын балдарын үйүндө карап отурган жылдары эсепке алынат: эң көп 9 жыл стаж кошулат жана кеминде 6 жыл расмий иштеген болушу керек.
Белгилей кетсек, жаш курак боюнча аялдар – 58, ал эми эркектер – 63 жашында пенсияга чыгат. Ошол эле учурда мыйзамда мөөнөтүнөн мурда пенсияга чыгуу үчүн бир катар жеңилдиктер каралган: көп балалуу энелер, бийик тоолуу же алыскы барууга кыйын аймактарда жашап-иштеген жарандар, оор шарттарда иштегендер мөөнөтүнөн мурда пенсияга чыга алат.
