Баткен облусунун Кадамжай районундагы Айрыбаз (Марказ) айыл аймагында жер тилкелерин мыйзамсыз трансформациялоо фактысы боюнча кылмыш иши козголуп, тергөө амалдары жүрүп жатат. Бул тууралуу УКМКнын басма сөз кызматы билдирди.
Маалыматка ылайык, Айрыбаз айыл аймагында 2017-жылдын 18-апрелиндеги №15 токтому менен 581 жаранга үй куруу үчүн 95 га жер мыйзамсыз трансформацияланган. Ошол эле учурда, бөлүштүрүлгөн жерлер айрым муниципалдык мекемелердин жана укук коргоо органдарынын жетекчилерине берилген.
Ыкчам-иликтөө иштердин жүрүшүндө Кадамжай районунун Айрыбаз айыл аймагынын жер тилкелеринин 197 мамлекеттик актылары алынды, алардын ичинде аталган аймакка кирбеген башка административдик-аймактын жашоочулары да бар экени аныкталды.
Азыркы учурда жер тилкелерин мыйзамсыз берүүгө тиешеси бар кызмат адамдарын аныктоо боюнча тиешелүү иштер жүргүзүлүүдө.
