Кафе, ресторан жана башка коомдук тамактануучу жайларда тейлөө акысы жоюлгандан кийин тамак-аштардын баасы көтөрүлбөйт. Бул тууралуу «Биринчи радионун» эфиринде Экономика жана Коммерция министрлигинин монополияга каршы саясат башкармалыгынын жетектөөчү адиси Адилет Жумабеков билдирди.
Анын айтымында, министрлер кабинети кабыл алган токтомго ылайык, тамактануучу жайлардагы бардык кызматтар менюда көрсөтүлгөн баанын ичинде болушу керек.
«2026-жылдын 1-январынан тарта ресторан, кафе жана башка коомдук тамактануучу жайларда кызматкерлердин негизги буйрутма наркынан тышкары өзүнчө тейлөө же башка иш-аракеттери үчүн акы алуусуна тыюу салынат.
15 же 20 пайыз тейлөө акысы эч кандай норма менен бекитилген эмес. Болгону, мекемелер өз алдынча тейлөө акысы деп кошуп алышкан. Азыр пайыздарды алууга тыюу салынды. Мындан ары тейлөө акысы ижара акысы, коммуналдык кызматтар сыяктуу эле берилген буйрутманын ичинде болот», — дейт Жумабеков.
Белгилей кетсек, эми кафе жана ресторан ээлери официанттарга белгилүү өлчөмдөгү эмгек акы төлөп башташат.
