Жалал-Абад облусунун Кара-Көл шаарынын экс-мэри бюджеттик каражаттарды максатсыз пайдалануу жана кылмыштуу кирешелерди легалдаштыруу боюнча кармалды. Бул тууралуу УКМК билдирет.
Кара-Көл шаарынын мэриясынын кызмат адамдары Токтогул районунун Үч-Терек айылынан Кара-Көл шаарынын Кетмен-Төбө айылына чейинки узундугу 10 чакырымдан ашык суу түтүк тармагын куруу боюнча К.Б. ЖЧКсы менен атайылап пайдасыз келишим түзүшкөн.
Натыйжада мурда болгон суу түтүктөрү демонтаждалып, сатылып кеткендиги, ал эми жаңы тармакты куруу боюнча иштер сапатсыз аткарылгандыгы, буга байланыштуу түтүк өткөргүчтөр пайдаланууга жараксыз болуп, Кетмен-Төбө айылынын тургундары 10 жылдан ашык убакыттан бери ичүүчү таза суу менен камсыздалбай келишкендиги аныкталган.
Мындан тышкары, E.И.M. Кара-Көл шаарынын мэри болуп иштеп турганда мыйзамсыз жол менен алынган мүлктү легалдаштырган деп шектелүүдө. Учурда ыкчам-иликтөө иш-чаралары улантылууда.
