Бишкекте каржылык пирамида ыкмасын колдонуп адамдарды 35 миң долларга алдап кетти делген үч киши кармалды. Бул туурасында Ленин райондук милициянын маалымат кызматы кабарлады.

Маалыматка ылайык, С.К. аттуу калаа тургуну Ленин РИИБге арыз жазып, аны алдап кеткен үч кишиге чара колдонууну суранган.

«Алар июнь айында Жал кичи районунда жайгашкан фирмалардын биринин офисинде Antares Trade деген каржылык пирамида уюштуруп, жабырлануучунун 35 миң долларын алдап алган. Каражатты алып жатканда көбөйтүп берүүнү убадалаган. Бирок кийинчерээк из жашырып кетишкен», -деп берилет маалыматта.

Аталган факты КЖБРге катталып, Жазык кодексинин 204-беренеси («Алдамчылык») менен сотко чейинки өндүрүш ачылган.

Ыкчам изилдөөдөн соң 45 жаштагы М.Д., 39 жаштагы Т.С. жана 57 жаштагы Х.Ч. аттуу адамды шектүү катары кармаган. Натыйжада соттун чечими менен үчөө тең эки айга №1 тергөө абагына киргизилген.

Белгилей кетсек, мындан сырткары, кармалган жарандардын үстүнөн дагы 10 адамдан арыз түшүп, алданып калганын билдиришкен. Учурда алардын чыгымдары такталууда.