Бүгүн, 25-ноябрда Оштун мэри Жеңишбек Токторбаев Казакстандын президенти тарабынан 2-даражадагы “Достук” ордени менен сыйланды. Бул тууралуу Ош мэриясы кабарлайт.
Маалыматка ылайык, Ош шаарында Казакстан президенти К.К. Токаевдин “Атам жөнүндө баян” аттуу китебинин бет ачары болуп өттү. Иш-чарага мэр Жеңишбек Токторбаев, Казакстан Республикасынын Маданият жана маалымат министри Аида Балаева, Кыргыз Республикасынын Маданият, маалымат жана жаштар саясаты министринин орун басары Аскарали Мадаминов катышты.
Иш-чаранын жүрүшүндө Жеңишбек Токторбаев Казакстандын президенти тарабынан 2-даражадагы “Достук” ордени менен сыйланды. Сыйлыкты Аида Балаева тапшырып, мэрге элдин достугун даңазалоодо Ош шаарында жасаган иштери үчүн ыраазычылыгын билдирди.
Мындан тышкары, Казакстан президенти Касым-Жомарт Токаевдин китебинин негизинде тартылган “Бауыр” аттуу даректүү тасма көрсөтүлдү.
