Кеминде 16 жаштагы Ольга Хабарованы өлтүрүүгө айыпталып жаткан адам күнөөсүн мойнуна албай жатат. Бул тууралуу жабыркаган тараптын жактоочусу Назира Абдумуминова билдирди.

Анын айтымында, учурда кылмыш ишин Кемин райондук соту карап жатат. Ошондой эле соттук отурумдун жүрүшүндө айыпталуучу көрсөтмө берүүдөн баш тарткан.

Белгилей кетсек, кылмыш 21-июнда Кемин шаарында болгон. Мектеп окуучусу ошол күнү эртең менен 9-класстын аттестатын алган. Андан соң кошунасынын телефону менен апасына чалып, эгин талаасындагы сугат иштери бүткөндө үйүнө келерин кабарлаган, бирок ошол бойдон кайтып келген эмес. Анын жансыз денеси ошол эле күнү шаардын чекесиндеги токойдон табылып, зордук-зомбулуктун белгилери аныкталган.

Адам өлтүрүүгө шектелип, мурда бир нече жолу соттолгон 42 жаштагы жергиликтүү тургун кармалган. Тергөөнүн версиясы боюнча, окуя болгон күнү кыз чындыганда эле андан апасына чалыш үчүн телефон сураган. Ошол учурда шектүү кызга тийишип, зомбулук көрсөтүп баштаган. Кыз кыйкырып, коркуп баштаганда эл укпасын деп кызды муунтуп өлтүргөн. Анын сөөгүн жашыруу үчүн кошунасынын унаасын сурап, сөөктү унаа менен токойго алып кеткен.