Министрлер кабинетинин төрагасы Адылбек Касымалиев ички рынокту күйүүчү-майлоочу май менен камсыздоо боюнча кеңешме өткөрүп, ага нефтетрейдер компаниялардын жетекчилери катышты. Бул тууралуу «Ынтымак ордо» кабарлады.
Минкаб башчысы майдын кымбатташы Жакынкы Чыгыштагы геосаясий абалдын кесепети экенин белгилеген. Касымалиевдин айтымында, азырынча май куюучу жайларда баанын кескин өсүшүнө жол берилген жок. Буга ички запас өбөлгө болууда.
«Дүйнөлүк рыноктогу туруксуздук маалында колдонула турган кошумча каржылык жана салыктык инструменттер дыкат иштелип чыкты. Министрлер кабинети мамлекеттик түз субсидиялоо маселесин караштырууда. Мында мамлекет менен бизнестин консолидацияланган позициясы маанилүү. Нефтетрейдерлер жогорку социалдык жоопкерчиликти көрсөтүшү керек», — деди Касымалиев.
Натыйжада өкмөт башчы Монополияга каршы кызматка өлкөнүн бардык мунай базаларында баага жана запастардын көлөмүнө күн сайын мониторинг жүргүзүүнү тапшырып, Энергетика министрлигине үзгүлтүксүз логистиканы камсыздоого милдеттендирди.
Буга катар тиешелүү мамлекеттик органдарга жасалма тартыштык түзүлгөн же күйүүчү майдын баасы алып сатарлык менен жогорулатылганучурларга дароо бөгөт коюу боюнча көрсөтмө берилди.
