2021-жылга республикалык бюджеттин мамлекеттик бюджет резервинде коронавируска каршы күрөшүүгө 2,4 миллиард сом каралган. Бул тууралуу Экономика жана каржы министрлиги билдирди.
Маалым болгондой, каражат күтүлбөгөн чыгымдарды жабууга, анын ичинде коронавирус инфекциясы менен байланышкан эпидемиологиялык кырдаал олуттуу начарлап кеткен учурда каржыланууга багытталган.
Кошумчалай кетсек, өкмөттүн 2021-жылдын 14-январындагы токтому менен Саламаттыкты сактоо жана социалдык өнүгүү министрлиги медкызматкерлерине жана кызыл зоналарда иштеген жарандарга компенсациялык төлөмдөрү үчүн 500 миллион сом бөлүүнү караган.
«Экономика жана каржы министрлиги коронавирустук инфекцияга каршы эмдөө иш-чараларынын алкагында өнүгүү боюнча өнөктөштөргө (эл аралык донорлорго) COVID-19га каршы эмдөө үчүн каражат бөлүү үчүн долбоордук билдирмелерди жөнөтүүдө. Өкмөт COVID-19га каршы күрөшүү үчүн каражат чогултуу жаатында донорлор менен ишти күчөтүү милдетин койду», — деп билдирди министрлик.
