Туризмди өнүктүрүүнү колдоо фондунун президенти Кудрет Тайчабаров: Акыркы мезгилде туризм тармагында жакшы жылыштар болуп жатат, Көлдө «Үч чоку» деген долбоор башталган, аны ишке ашыруу үчүн «Кыргыз Куршевель» деген мамлекеттик ишкана түзүлдү, бул ишкананы биздин фонддун «баласы» деп атаса болот. Бишкектин жанында Baytik Mountain Resort деген дагы эс алуучу жай курууга киришип жатабыз, анткени азыр Ала-Арча же Чункурчакка эл батпай кетип баратат.
Мындай ири долбоорлорду ишке ашырып, күнү-түнү жана жылы бою иштей турган эс алуу жайларын куруу үчүн, каражаттан тышкары, өзүнчө түзүм иштесе болмок. Башка мамлекеттер менен кызматташканда, алардын көпчүлүгүндө туризм министрлиги жана өзүнчө спорт министрлиги бар экенин көрүп жүрөбүз. Азыр мына, Парижде Олимпиада өтүп жатат, Кыргызстанды дүйнөгө спортчулар таанытып жатат, бирок биздин спорт министрлигибиз жок.
Спортту маданият министрлигине киргизип койгон, ал министрликти болсо өнөр адамдары же киночулар жетектейт, алар спортко адистешкен эмес. Туризм боюнча дагы ошондой – туризм департаментинде 11 адам иштейт, биздин фонддо – 41 киши, «Кыргыз Куршевелде» – он чакты адам, мунун баары өзүнчө эле бир министрликтин деңгээли болуп калууда, бирок министрлик жок. Министрлик болгондо, башка мамлекеттер менен мамиле түзүү дагы оңоюраак болмок, биз менен алар эсептешмек…
