Кыргызстандагы бардык мамлекеттик музейлер 2025-жылдын 1–30-октябры аралыгында акысыз “Ачык эшиктер айы” өткөрүлөт. Бул тууралуу Маданият, маалымат жана жаштар саясаты министрлигинин басма сөз кызматы билдирди.
Маалыматка ылайык, иш-чара өлкө башчы Садыр Жапаровдун руханий адеп-ахлактык өнүгүү, улуттук наркты даңазалоо жана тарых-мураска болгон кызыгууну арттыруу боюнча Жарлыктарын ишке ашыруу алкагында, ошондой эле өлкөдө алгачкы музейдин түзүлгөндүгүнүн 100 жылдыгына арналган.
Программанын алкагында туруктуу жана убактылуу көргөзмөлөргө акысыз кирүү, калктын ар түрдүү катмары үчүн атайын экскурсиялык маршруттар, тарыхый жана маданий багыттагы экскурсиялар, лекциялар жана мастер-класстар уюштурулат.
“Ачык эшиктер айы” – бул коомчулуктун улуттук маданий мурас менен жакындан таанышып, тарыхка болгон кызыгуусун арттырууга жана жаштар арасында патриоттук сезимди ойготууга багытталган маданий долбоор.
