Бүгүн, 16-ноябрь Бишкек шаарында кыргыз киносунун титаны Болот Шамшиевдин 80 жылдыгына арналган илимий- практикалык иш-чара өтүп жатат.
Ага кино, маданият, тарыхтын көрүнүктүү өкүлдөрү, мамлекеттик-коомдук ишмерлер, Шамшиевдин жанында болгон замандаштары, шакирттери катышышууда. Алардын арасында уулу Чыңгыз Шамшиев, жубайы жана чыгармачылыктагы музасы Айтурган Темирова, актёр жана шакирти Мурат Мамбетов, актриса Назира Мамбетова дагы бар.
Ошондой эле Казакстан, Өзбекстандан келген кино эксперттер катышып, кино ааламындагы «Кыргыз кереметинин» жаралуусуна Болот Шамшиевдин кошкон салымы чоң экендигин белгилеп өтүшүүдө.
Иш чарада белгилүү кино режиссёр БОЛОТ ШАМШИЕВдин кино менен жуурулушкан өмүр таржымалы баяндалган тарыхий тасма көрсөтүлдү. Тасманы актёр, режиссёр Мурат Мамбетов койгон. Анда Шамшиевдин ар кандай учурда, кыргыз тасмалары тууралуу айткан интервьюлары кошулган.
