Кыргыз эл жазуучусу, драматург Мар Байжиевдин сөөгү «Ала-Арча» көрүстөнүндө жерге берилди. Бул тууралуу Маданият, маалымат, спорт жана жаштар саясаты министрлиги кабарлады.
Аны акыркы сапарга узатуу зыйнаты Малдыбаев атындагы Кыргыз улуттук академиялык опера жана балет театрында өттү. Ага бийлик өкүлдөрү, маданият ишмерлери, кесиптештери жана жакындары катышты.
Мар Байжиев 29-октябрь күнү 86 жаш курагында көз жумду.
Жазуучу 1935-жылдын 23-мартында Жалал-Абад облусунда туулган. Мар Байжиев драматург, прозаик, журналист, жазуучу, адабиятчы, котормочу, кино жана театр режиссёру болгон. Кыргыз элинин бай маданиятын түрдүү жанрда, ракурста даңазалоодогу эбегейсиз эмгеги үчүн III даражадагы Манас жана Данакер ордендери менен сыйланган.