Кыргыз Республикасынын жарандарынын улуттук паспортторунун айрым типтерин киргизүү маселелери жөнүндө токтом кабыл алынды. Тиешелүү чечимге Министрлер Кабинетинин Төрагасы Адылбек Касымалиев кол койду.

Анын максаты Кыргызстандын аймагында Кыргызстандын жаранынын 2025-жылдын үлгүсүндөгү паспортун (ID-карта), Кыргыз Республикасынын 2025-жылдын үлгүсүндөгү жалпы жарандык паспортун киргизүү.

Токтом менен Кыргызстандын жаранынын 2025-жылдын үлгүсүндөгү идентификациялык картасы –  паспорту (ID-карта) жөнүндө Жобо, Кыргызстандын жаранынын 2025-жылдын үлгүсүндөгү жалпы жарандык паспорту жөнүндө Жобо кабыл алынды.

Кыргызстандын жарандарынын 2024-жылдын үлгүсүндөгү паспортторун (ID-карта), Кыргызстандын жарандарынын 2023-жылдын үлгүсүндөгү жалпы жарандык паспортторун берүү ушул паспорттордун бланктары аяктаганга чейин жүргүзүлөт.

Кыргызстандын жарандарынын 2025-жылдын үлгүсүндөгү паспортторун (ID-карта), Кыргызстандын жарандарынын 2025-жылдын үлгүсүндөгү жалпы жарандык паспортторун берүү Кыргызстандын жарандарынын 2024-жылдын үлгүсүндөгү паспортторунун (ID-карта), Кыргызстандын жарандарынын 2023-жылдын үлгүсүндөгү жалпы жарандык паспортторунун бланктары аяктагандан кийин жүргүзүлөт.

Президенттин Иш башкармасына караштуу “Кызмат” мамлекеттик мекемесине Кыргызстандын жарандарынын 2025-жылдын үлгүсүндөгү паспортторун (ID-карта), Кыргызстандын жарандарынын 2025-жылдын үлгүсүндөгү жалпы жарандык паспортторун жекелештирүүгө ыйгарым укук берилди.