Юстиция министрлиги жалпыга маалымдоо каражаттарынын жаңы реестрин ишке киргизди. Ачык базага 2 миң 959 басылма тууралуу маалымат киргизилип, бардык колдонуучулар үчүн жеткиликтүү болду.
Ведомствонун маалыматына ылайык, мындан ары ЖМКны каттоо жөнүндө күбөлүк электрондук форматта берилет. Ошондой эле реестрге маалымат киргизүү мөөнөтү 7 жумушчу күндөн 3 күнгө чейин кыскартылды.
Жаңы тартипке ылайык, ЖМКнын уюштуруучусу же аталышы өзгөргөн учурда гана кайра каттоодон өтүү талап кылынат. Ал эми башка маалыматтар өзгөрсө, бул тууралуу 30 календардык күндүн ичинде Юстиция министрлигине кабарлоо зарыл.
