Кыргызстанга которулган акчанын көлөмү өткөн жылдын 11 айында 17,2 пайызга өстү. Бул тууралуу Евразиялык өнүктүрүү банкы маалымдады.
Буга себепкер, тагыраагы, кошумча фактор катары рублдин долларга карата курсу 2024-жылдын орточо көрсөткүчүнө салыштырмалуу 10,6 пайызга жогорулашын эсептесек болот. Ал доллар менен келген акчанын агымын көбөйттү.
Ошол эле учурда 2024-2025-жылдары сомдун долларга карата орточо жылдык курсу бир долларга 87 сом деңгээлинде сакталды. Которулган акчанын арбышы ички соода жаатындагы көлөмдүн да өсүшүнө алып келди.
Улуттук банктын маалыматына ылайык, өткөн жылдын 11 айында өлкөгө үч миллиард 223,6 миллион доллар которулган.
