Ош облусунун Ноокат районунун акими Данир Иманалиевдин кызматтык унаасы жол кырсыгына кабылды. Бул тууралуу 7-каналга райондун башчысы маалыматты тастыктады. Анын айтымында, кырсык катталган учурда аким өзү унаада болгон эмес.
«Мен жумуш бүткөндөн кийин калганмын. Унааны айдоочум айдап кеткен. Кырсык болгонун мен да эртең менен уктум. Айдоочум үй-бүлөлүк маселелери менен шаарда жүргөнүн айтты. Анын мас абалында болгонбу же болгон эмеспи азыр териштирүү жүрүп жатат. Бул үчүн айдоочу административдик жазага тартылат. Тактап айтканда, жумушунан кетет»,- деди Иманалиев.
Эске салсак, окуя Ош шаарынын Масалиев көчөсүндө 15-ноябрь түнү орун алган. Ал эми, Ош ШИИБнын ЖКККБ бөлүмүнүн басма сөз кызматы менен байланышканыбызда маалымат бере алган жок.
