Кызыл-Кыя шаарынын Ак- Булак айыл аймагында фельдшердик-акушердик пункт курулуш реестрине катталбай, уруксат кагаздары жок курулгандыгы аныкталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, өз билемдик менен курулуш-монтаждоо жумуштарын аткарып, курулуштун техникалык регламенттерин бузган «Анвар Групп» ЖЧКсына карата административдик чаралар көрүлдү.
Мамлекеттик архитектура-курулуш контролдоо департаментинин Баткен регионалдык башкармалыгы тарабынан акт түзүлүп, 200 миң сом өлчөмүндө айып пул салынды.
