Улгайган адамдардын эл аралык күнүнүн алдында министрлер кабинетинин төрагасынын биринчи орун басары Данияр Амангелдиев Бишкекте жашаган 100 жашка чыккан жарандардан кабар алды. Социалдык фондунун маалыматы боюнча, учурда өлкөдө 100 жаш жана андан жогорку курактагы 178 жаран жашайт.
Алардын ичинен 21 адам Бишкекте турат. Амангелдиев Кичикан Чолиева, Бурул Дүйшалиева жана Ефросинья Соколовадан кабар алды. Узак жашоочуларга белектер тапшырылып, материалдык жардам көрсөтүлдү.
Жолугушуулардын жүрүшүндө улуу муун өкүлдөрүнүн өмүр жолу, алардын эмгектик жана коомдук салымы, ошондой эле үй-бүлөлүк жана адеп-ахлактык баалуулуктарды сактоодогу ролу тууралуу баарлашуулар болду. Данияр Амангелдиев улуу муун өкүлдөрүнө урмат-сыйын жана ыраазычылыгын билдирип, алардын муктаждыктарына көңүл буруунун жана татыктуу жашоо шарттарын камсыз кылуунун маанилүүлүгүн баса белгиледи.
Улгайган адамдардын эл аралык күнү жыл сайын 1-октябрда белгиленет. Бул дата улуу муун өкүлдөрүн колдоо, алардын укуктарын жана кызыкчылыктарын коргоо маселелерине, ошондой эле алардын коомду өнүктүрүүгө кошкон салымын таанууга көңүл бурууга багытталган.
