Эртең Бишкекте футбол боюнча Кыргызстан менен Ирандын беттеши өтөт. Кыргызстандын Футбол боюнча улуттук курама командасынын башкы машыктыруучусу Максим Лисицын оюн алдында кайрылуу жасады.
«Өзүңүздөр билгендей эле, конокто оор жана ийгиликсиз беттешти өткөрдүк. Ошондуктан биздин негизги милдет балдарды физикалык жактан калыбына келтирүүдөн тышкары, аларды психологиялык жактан кайра шыктандырууга жана эртеңки боло турган өтө оор беттешке даярдоого аракет кылуу. Эртең бизди күчтүү курама команда, мыкты футболчулар менен беттеш күтүүдө. Биздин футболчулар бул тирешүүгө даяр деп ишенем!«,-деди Лисицын.
Ал эми, Кыргызстандын футбол боюнча Улуттук курама командасынын оюнчусу Алимардон Шүкүров «Мурунку беттештен, андагы жеңилүүдөн чыгуу оор болгону түшүнүктүү, бирок бул жашоо жана бул спорт — мындай нерселер болуп турат. Ал эми күйөрмандарыбызды кубантуу үчүн үйдө жакшы ойношубуз керек«,- дейт.
