Бишкекте “Манас” эл аралык аэропортуна алып баруучу Васильевский тракт көчөсүн реконструкциялоо иштери уланууда.
Бишкек мэриясынын маалыматына ылайык, 5-июлдан тартып оңдоо иштеринин үчүнчү этабы башталды. Анын алкагында Комсомольская көчөсүнөн Чоң Чүй каналына чейинки, жалпы узундугу 7 чакырым болгон тилкеде жол жаңыланат.
Оңдоо иштери учурунда көчө толугу менен жабылбайт. Унаалар үчүн жолдун бир тарабы ачык болуп, кыймыл уюштурулат.
Белгилей кетсек, реконструкциянын биринчи этабы 23–26-июнь күндөрү жүргүзүлүп, 8 чакырым жол оңдолгон. Ал эми экинчи этап 27-июндан 4-июлга чейин уланып, Фучик көчөсүнөн “Манас” эл аралык аэропортуна чейинки тилкени камтыган.
