Аткезчилик менен кармалган эки КАМАЗ жана минералдык жер семирткичтер мамлекетке конфискацияланды. Бул тууралуу УКМКнын басма сөз кызматы билдирди.
Маалыматка ылайык, КРнын мамлекеттик чек арасын өткөрүү пунктунан тышкары, Баткен облусунун Лейлек районундагы “Тал” жергесинен кесип өтүүгө аракет кылган З.Ж.С. жана Э.Г.Р.нын башкаруусундагы “А5511L”, “03KG105ААL” мамлекеттик номурлуу эки КамАЗ кармалган.
Айдоочулар менен бирге контрабандалык жүктүн ээлери Кыргызстандын эки жараны болгон. Бул жүк ташуучу унааларды текшерүү учурунда жалпы салмагы 20 тонна болгон “Селитра” минералдык жер семирткич табылган.
«21-декабрда Лейлек райондук сотунун өкүмү менен бул контрабандалык минералдык жер семирткичтерди ташууну уюштурууга катышкан Кыргызстандын жарандары З.Ж.С., Э.Г.Р., Н.Ж.А. жана А.М.С. Кылмыш-жаза кодексинин 231-беренесинин 3-бөлүгүнүн 4-пунктунда каралган (“Экономикалык контрабанда”) кылмышты жасагандыгы үчүн күнөөлүү деп табылып, алардын ар бирине 160 000 сомдон айып пул салынды. Ошондой эле “А5511L”, “03KG105ААL” мамлекеттик номурлуу эки «КамАЗ» жана жалпы салмагы 20 тонна минералдык жер семирткич мамлекетке конфискацияланды»,- деп берилет маалыматта.
