Эми билим берүүдө жасалма интеллект пайдаланыла баштайт. Ал үчүн Агартуу министрлиги мугалимдерге жана билим берүү кызматкерлерине жасалма интеллектти колдонууну үйрөтүүчү онлайн-курс иштеп чыккан. Ал https://ustat.edu.gov.kg/ платформасында жайгаштырылып, анда жасалма интеллект тууралуу негизги түшүнүктөр, колдонуу ыкмалары жана мүмкүнчүлүктөр тууралуу модулдар камтылган. Ошондой эле YouTube платформасында маалыматтык видеороликтер, ар-кандай колдонмо материалдар жарыяланып турат. Мектептин мугалимдерине да тренингдер өтүлөт.
Бул туурасында «Жаңылыктын жарчысы» педагогикалык форумунун алкагында министрдин санариптик өнүктүрүү боюнча орун басары Лира Самыкбаева маалымдады.
“Бул платформа аркылуу мугалимдин сабакка тезирээк, жеңилирээк жана натыйжалуураак даярданышына, ошондой эле билим берүү контентин жакшыртууга, мугалимдин санариптик ассистенти катары бир нече секунддун ичинде сабакка керектүү материалдарды тандап, суроолорду түзүп, сабакка ылайыктуу кызыктуу иш-аракеттерди сунуштай алат”- деди министрдин орун басары.
«Биз балдарга жасалма интеллектини жоопкерчилик менен, туура жана пайдалуу колдонууну үйрөтүшүбүз керек. Бул — келечекке жасаган инвестиция», — деп жыйынтыктады Лира Самыкбаева.
