Мурдагы вице-премьер-министр Жеңиш Разаков кармалды. Аталган маалыматты Kaktus.media сайты күч түзүмдөрүнө шилтеме берип билдирди.
Маалыматка ылайык, кечээ, 24-январда ИИМдин тергөө кызматы Разаковду алдамчылык боюнча кармашты. Анын үстүнөн Арзыбек Бурканов арыз жазган. Ал белгилегендей, Разаков чогу ишкердикти өнүктүрүүгө каражат алып, жыйынтыгында акчадан же бизнестен жок калган.
Белгилей кетсек, Жеңиш Разаков 2016-жылы чек ара маселелери боюнча вице-премьер-министр катары өкмөттүн курамында болгон. 2017-жылдын августунан октябрына чейин Коопсуздук кеңешинин катчысы болуп, кийин президент Жээнбековдун кеңешчиси болгон. Ал 2018-жылдын 20-апрелинен 2020-жылдын 11-февралына чейин вице-премьер-министр болуп иштеген.
Ошондой эле, Арзыбек Бурканов Жогорку Кеңештин III жана IV чакырылыштарында депутат болгон.