Нарын шаарынын мэри Самарбек Болотбеков камактан бошотулду. Ага Башкы прокуратуранын прокурорунун өтүнүчү жана тышка чыкпоо жөнүндөгү тилкаты негиз болгон. Мындай чечим, кечээ 20-сентябрда Бишкектин Биринчи Май райондук соту тарабынан кабыл алынган. Бул тууралуу соттун маалымат кызматы кабарлады.
Самарбек Болотбеков соттук териштирүү учурунда тергөөчүнүн уруксатысыз эч жакка чыкпоого, териштирүүгө тоскоолдук жаратпоого жана чакырган убакта барып турууга милдеттендирилди.
Ал 18-сентябрда УКМК тарабынан «Жогорку Кеңештин мурдагы депутаты Руслан Чойбеков 2020-жылдагы парламенттик шайлоодо 300 миң доллар алган» деп тергелип жаткан иштин алкагында кармалган.
Азырынча УКМК шектүүлөргө каршы ким арыз жазганын жана иштин чоо-жайын толук кабарлай элек.
Болотбеков Нарынга мэр болуп быйыл июнь айында дайындалган болчу.