Нарында “Жамбаш” каймана аты менен таанымал болгон жаран кармалды. Бул тууралуу Нарын ОИИБден билдиришти.
Маалыматка караганда, милицияга Ак-Талаа районун тургуну арызы менен кайрылган. Аны 17-октябрь күнү болжол менен саат 16:00 чамаларында “А.” аттуу жаран эч себепсиз ур-токмокко алган. Ошондой эле, анын иштетип жаткан ашканасына келип, ай сайын 7-8 миң сомдон опузалап талап кылып жүргөндүгүн билдирген.
Аталган факт боюнча Кылмыш-жаза кодексинин 208-беренеси 4-бөлүмүнүн 2 пункту (Опузалап талап кылуу) менен кылмыш иши козголгон.
Ыкчам иликтөө иш-чаралардын жүрүшүндө, Жаңы-Талап айылынын 1977-жылы туулган тургуну (кайманаты Жамбаш) кармалып, тергөө кызматына жеткирилген.
Шектүү Нарын шаарындагы ЖАКтын СИЗО-4 мекемесине 1-айлык мөөнөткө камакка алынган. Учурда тергөө иштери уланууда.
