Ош облусунда мыйзамсыз менчиктештирилген эки медициналык борбор кайрадан мамлекетке кайтарылды. Бул тууралуу УКМК кабарлады.
Маалыматка караганда, Ош шаарындагы «Касиет» жана Кара-Суу районундагы «Авангард» медициналык борборлору 2005-2007-жылдары соттун мыйзамсыз чечимдери менен, жасалма документтердин негизинде муниципалдык менчиктен чыгарылган.
Ыкчам-иликтөө иштеринин жыйынтыгында, «Касиет» борбору Ош шаардык мэриясынын карамагына өткөрүлсө, «Авангард» клиникасы Кара-Суу райондук администрациясынын балансына кайтарылды. УКМК мамлекетке таандык жер тилкелерди жана ишканаларды кайтарып алуу боюнча иштерди улантып жатканын белгиледи.
