Бүгүн Ош шаарынын аймагында өткөрүлгөн жалпы ишембиликте 7630 түп ийне, жазы жалбырактуу жана мөмө берүүчү көчөттөр жана гүлдөр отургузулду. Бул тууралуу ош шаарынын мэриясынын басма сөз кызматы билдирди.
Маалыматка ылайык, 187,2 гектар жер аянты, 12100 метр ирригациялык арыктар тазаланып, 870 куб таштанды чыгарылган.
Жазгы үч айлыктын алкагында өткөрүлүп жаткан бул жолку ишембиликте шаар аймагын жашылдандыруу жана көрктөндүрүү максатында негизги басым бак-дарактарды актоо, көчөт отургузуу иштерине жасалды.
Ишембиликке мекеме-уюмдардын кызматкерлери, жогорку, орто окуу жайлардын студенттери, билим берүү, саламаттыкты сактоо тармактары жана жергиликтүү тургундар, жалпы 19872 жаран активдүү катышып, шаардын тазалыгын сактоого өз салымдарын кошушту.
Белгилей кетсек, “Жашыл мурас” улуттук демилгесин жайылтуу максатында жарыяланган Ош шаарын жашылдандыруу, көрктөндүрүү жана санитардык тазалоо боюнча жазгы үч айлыктын алкагында ишембиликтер 31-майга чейин уланат.
