Жасалма акча сатууга шектелген эки жаран кармалды. Бул тууралуу Ош ОИИБнин басма сөз кызматы билдирди.

Маалыматка ылайык, ушул жылдын 3-мартында Кара-Суу райондук Ички иштер башкармалыгынын кызматкерлери тарабынан Кара-Суу районун аймагында “К” аттуу жаран ири суммадагы жасалма АКШ доллар акчаларын сактап, жана сатууну көздөп жүргөндүгү боюнча маалымат түшкөн.

Бул факты боюнча текшерүү иштеринин натыйжасында, Ош областынын Алай районун тургуну 36 жаштагы Н. Т.,аттуу жаран кармалган. Анын жанынан шек саналган 50 даана 100 АКШ доллар купюралары болгон. Бул кылмышка катыштыгы бар дагы бир шектүү Жалал-Абад областынын тургуну А.Б. аттуу жаран кармалып, анын курткасынын чөнтөгүнөн жасалмага шек саналган 7 даана 100 АКШ доллары купюралары табылып алынган.

Окуя болгон жерге кароо жүргүзүлүп, тиешелүү экспертизалар дайындалган. Жалпысынан 57 даана шек саналган АКШ доллар купюраларын сатууга аракет кылган шектүүлөргө Кылмыш-Жаза Кодексинин 233-беренесинде боюнча кылмыш иши козголуп, тергөө амалдары башталган.

Шектүүлөр жасаган кылмышын толугу менен мойнуна алып, Кылмыш-жаза процессуалдык кодексинин 96-беренесинин негизинде Кара-Суу РИИБнин убактылуу кармоочу жайына киргизилген.

Учурда тергөө иштери уланууда.