Ошто 2 жашар баланын ичинен 17 даана магниттик оюнчук алып чыгышты. Бул тууралуу Ош областтар аралык балдар клиникасынын ооруканасы билдирди.
Маалым болгондой, ооруканага 2 жашар бейтап магниттик оюнчуктун 17 даанасын жутуп алган абалда кайрылган. Бейтап 3 күн аралыгында улам-улам кусуп жаткандыгына байланыштуу райондук ооруканага кайрылып, рентген текшерүүнүн жыйынтыгында ичегилерде бир нече тизилген бөтөн зат аныкталып, биздин мекемеге жөнөтүлгөн.
“ООАБКОнун тажрыйбалуу хирургдарынын бригадасы бейтапка шашылыш операция жасашты жана жутулган 17 даана магниттер ичегилерден толук алынган. Учурда бейтаптын абалы туруктуу, тиешелүү дарылоо жана көзөмөл жүргүзүлүп жатат”, — деп жазылат маалыматта.
Белгилей кетүүчү жагдай: магниттик оюнчуктар балдар үчүн өтө кооптуу. Бир нече магнит жутулганда алар ичеги-карын ичинде бири-бирине тартылып, оор кесепеттерге, операциялык кийлигишүүгө чейин алып келиши мүмкүн.
