Ошто Сулайман-Тоодон кулаган кыз ооруканада каза болду. Бул тууралуу 7-каналга Ош ШИИБден тастыкташты.
Маалыматка караганда, 18-январь күнү 14:00-15:00 чамасында Ош шаардык Тез жардам кызматына кабар түшкөн. Анда, Сулайман-Тоодо эс-учун жоготкон абалда жаткан кыз тууралуу айтылган. Жерине барган милиция 1996-жылы туулган Ош шаарынын тургунунун эс-учу жок жатканын аныкташкан. Тез жардам кызматы жандандыруу бөлүмүнө жаткырган. 13-февралда анын жараты оор болгондуктан, кыз көз жумган.
Алдын ала айтылган маалыматтар боюнча, кыз кокустан Сулайман-Тоонун күн чыгыш тарабында тайгаланып жыгылган. Анткени, окуя болгон жердин айланасында коюлган камералардан анын тоого жалгыз бара жатканын көрүүгө болот.
Учурда, окуя кокустук катары катталып, тергөө тобу иш-чара жүргүзүп жатат.
