Ошто темир жолдо бензин ташыган 3 вагон (цистерна) оодарылып, анын кесепетинен бир киши каза болду. Бул тууралуу ӨКМден билдиришти.
Маалыматка ылайык, кечээ, 21-декабрда Ош шаарына жанаша жайгашкан Нариман айыл аймагындагы «Өзгөчө кырдаалдарга чара көрүү боюнча түштүк борборунун» нефтьбазасына жакын жайгашкан темир жол станциясында күйүүчү май куюлган 3 цистерна (вагон) темир жол каттамынанан чыгып, оодарылып кеткен.
Аталган кырсыктын кесепетинен 1963-ж.т. Э.У. аттуу эркек кишини регулировщик басып калып каза болгон. Ал эми 22 жаштагы С.А аттуу эркек киши жаракат алып, Ош облустук ооруканасына жеткирилген. Учурда анын абалы туруктуу.
Жерине куткаруучулар тартылып, мындан сырткары ИИМден 10 кызматкер, тез жардам кызматынан 6 кызматкер тартылган.
Учурда өрт коопсуздугун көзөмөлгө алуу иштери аткарылууда.
