Бүгүн, 24-октябрда Ош облусунун Кара-Суу районундагы Отуз-Адыр магистралдык каналынын башкы суу алуу курулмасында “мезгил кутучасын” салуу аземи болуп өттү. Бул тууралуу Айыл чарба министрлигинин билдиришти.
Маалыматка ылайык, иш-чарага Министрлер кабинетинин төрагасынын орун басары – Айыл чарба министри Бакыт Төрөбаев катышты.
Куршаб-Сай ирригациялык системасын модернизациялоого (жаңылоого) жалпы 1 млрд 788 млн сом бѳлүнгѳн. Курулуш иштери Кара-Суу районунун 7 айыл аймагын жана 1 шаардын аймагын камтыйт. Жалпы узундугу 52,4 чакырымды түзгөн каналдардын ичинен 42,4 чакырымы толугу менен модернизацияланат.
Бул иш-чара “Климаттын өзгөрүүсүнө туруктуу суу чарба кызматтарын жакшыртуу” (CRWSP) долбоорунун алкагында өткөрүлүүдө. Долбоор Эл аралык өнүктүрүү ассоциациясы (МАР) тарабынан каржыланып, Дүйнөлүк банктын колдоосу аркасында ишке ашырылууда.
