Ошто тамактануучу жайда газ баллон жарылып, 36 жаштагы жаран каза болду. Бул тууралуу Ош ШИИБден билдиришти.
Милицияга 9-июль күнү болжол менен саат 16:00 чамасында Ош шаарынын тургуну тарабынан А.Мамыров көчөсүндө орун алган тамактануучу жайда жарылуу болуп, бир киши каза болуп калгандыгы тууралуу кабарланган.
Тергөө кызматынын маалыматына караганда бул жайда газ балон жарылып, натыйжада Ош облусунун 1987-жылы туулган Ш.Н каза болгондугу аныкталган.
Аталган окуя маалыматтардын электрондук журналына катталып, иликтөө иштери башталды жана экспертизалар дайындалды. Ал жерде иштеген кызматкерлер суракка камсыз болуп, жооптуу жетекчилердин жоопкерчилиги дагы каралууда.
Иликтөөнүн жыйынтыгы менен кошумча маалымат берилет.
