Президент Садыр Жапаров Kaktus.mediaга берген маегинде “75 адамдын каты” боюнча маалыматты башынан эле көзөмөлдөп, Жогорку Кеңешке чейин жетишин жана документке байланышкан бардык кыймылдарды байкап турганын билдирди.
“Маселе парламенттин пленардык жыйынына чыгарылмак болгондо, мен ыкчам жана чечкиндүү чараларды көрдүм. Кырдаал башынан эле көзөмөлдө болгон.
Мандатын тапшырган депутаттар боюнча айтсам, мурдагы маегимде белгилегендей, Жогорку Кеңеште саясий интригаларды жүргүзүүгө аракет кылган белгилүү бир топ түзүлгөн. Алардын пландары ишке ашпай калгандан кийин, болуп өткөн окуяларга тиешеси бар айрым депутаттар өз күнөөсүн түшүнүп, ошого байланыштуу мандаттарын тапшырган болушу мүмкүн.
Тергөө иштери аяктагандан кийин акыркы жыйынтыктар чыгарылат. Жалпысынан мен депутаттарды саясий оюндардан алыс болуп, элдин кызыкчылыгы үчүн мыйзам чыгаруу ишине жана мыйзамдардын аткарылышын көзөмөлдөөгө көңүл бурууга чакырат элем”.
