КР УКМК Чек ара кызматынын аскер кызматкерлери менен бирдикте күчтүү таасир этүүчү баңги заттарды өлкө аймагына ташып келүү менен шугулданган кылмыштуу топтун аракеттерине бөгөт коюлду.
Тактап айтканда, Казахстандан Кыргызстандын аймагына күчтүү таасир этүүчү дары-дармектерди тиешелүү уруксаат кагаздары жок алып кирүү учурунда Кыргыз Республикасынын жараны кармалды. Колго түшкөн каражаттарды атай кетсек: «Тропикамид» 288 таңгак, «Мидакс» 2160 даана жана «Лирика» 230 таңгак. Булардын баары адамдын ден соолугуна күчтүү таасир этүүчү психотроптук каражаттар экени аныкталган.
Ага улай, Бишкек шаарынын аймагында психотроптук каражаттарды сатуу боюнча ортомчулары жана уюштуруучулары кармалды.
Учурда контрабандалык схемаларды аныктоо боюнча тергөө иш-чаралары уланууда.
